Na Jovina Bujulu- MAELEZO
Wakulima wametakiwa kutumia vizuri dhamana waliyopewa ya ya mfumo wa vocha ili kuongeza uzalishaji wa mazao ya chakula na biashara kwa maslahi yao na Taifa kwa ujumla.
Wito huo umetolewa jijini Dar-Es-Salaam na Mkuu wa Kitengo cha Mawasiliano, Wizara ya Kilimo, Chakula na Viwanda Richard Kasuga alipokuwa akitoa taarifa ya ruzuku ya pembejeo za kilimo kwa njia ya vocha nchini.
Kasuga aliendelea kusema kuwa matumizi sahihi ya mbegu bora na mbolea kwa mfumo wa vocha kunaongeza uwezo wa Taifa kujitosheleza kwa chakula ili kuondokana na umaskini na kufanikisha mapinduzi ya kijani.
"Vocha ni haki ya mkulima na siyo upendeleo kwa mkulima anayepatiwa pembejeo hizo, hivyo itumike ipasavyo ili kuongeza uzalishaji wa mazao husika na kuleta tija katika mazao ya mahindi na mpunga" alisema ndugu Kasuga.
Katika utaratibu huo wa vocha, wakulima wa mahindi na mpunga hunufaika kwa kupatiwa pembejeo, ambazo ni mbegu bora na mbolea zinazotosheleza ekari moja ambapo Serikali inachangia asilimia 50 ya bei ya soko kwa kila aina ya pembejeo wanayopewa wakulima hao.
Vigezo vinavyotumika kutoa ruzuku kwa wakulima nchini ni pamoja na mnufaika kuwa na makazi ya kudumu katika kijiji na awea analima mpunga au mahindi na kaya iwe tayari kusaini hati ya pembejeo ili itumie kanuni ya kilimo bora.
Kigezo kingine ni kaya kuwa na eneo lisilopungua ekari moja pamoja na kaya zinazoongozwa na makundi maalum hususani wajane na walemavu ndiyo hupewa kipaumbele.
Akizungumzia faida za mfumo huo wa vocha, ndugu Kasuga alisema kuwa ni pamoja na kuongezeka kwa uzalishaji wa chakula, ambapo ongezeko hilo limewezesha wakulima kuuza chakula ndani na nje ya nchi hivyo kuinua hali zao kiuchumi.
Aidha, Taifa limeondokana na tatizo la kuagiza chakula nje ya nchi jambo ambalo limesaidia kuokoa fadha za kigeni hali inayotokana na elimu bora iliyotolewa kwa wakulima ambao wamehamasika kutumia mbegu bora na mbolea kwa maendeleo endelevu ya kilimo.
Utaratibu wa kutoa ruzuku ya pembejeo kutoka Serikalini kwa mfumo wa vocha ulianzishwa na mwaka 2008/2009 ili kuboreka mfumo wa namna ya kuwafikishia wakulima ruzuku ya mbegu bora na mbolea ambazo hazikuwa zikiwafikia wakulima walengwa watarajiwa kwa namna iliyotarajiwa.
Ili kuendeleza kilimo chenye tija, makampuni 23 ya mbolea na 27 ya mbegu bora ya mahindi na mpunga yanaendelea kutoa huduma ya kusambaza pembejeo hizo katika mikoa inayolima mazao hayo.
Katika msimu wa kilimo wa 2015/16 mbolea tani 99,993, mbegu bora za mahindi tani 10,271 na tani 815 za mpunga zitatolewa kuwanufaisha wakulima wapatao 999,926 nchini.
