Afisa
sera na utafiti CHADEMA makao makuu Waitara Mwita Mwikwabe (37) akiwa
amepumzika kwenye chumba cha mahakama ya hakimu mkazi mjini
Singida.(Picha na Nathaniel Limu).
Upelelezi
wa kesi ya kutoa matusi kwa Mbunge wa Iramba magharibi, Mwigullu Lameck
Nchemba, inayowakabili vigogo wawili wa Chama Cha Maendeleo na
Demokrasia (CHADEMA) umekamilika.
Kutokana
na kukamilika huko, kesi hiyo inayovuta hisa ya wakazi wengi wa mkoa
huu, itasikilizwa uchambuzi wa awali Septemba 3 mwaka huu katika
Mahakama ya Hakimu Mkazi mjini hapa.
Vigogo
hao wanaotuhumiwa kutenda kosa hilo Julai 14 mwaka huu saa 10 ni Afisa
Sera na Utafiti wa CHADEMA makoa makuu, Mwita Waitara Mwikwabe (37) na
mshauri wa CHADEMA na mhadhiri wa chuo kikuu Dar-es-salaam, Dk Kitila
Mkumbo (41).
Wakili
wa kujitegemea wa mjini hapa anayewatetea washitakiwa hao, Raymond
Kimu, aliiomba mahakama hiyo ipange kesi hiyo kusikiliza uchambuzi wa
awali Septemba 3 mwaka huu, kwa vile mshitakiwa Dk Kitila atakuwa na
mikutano muhimu kati ya sasa na Septemba 1 mwaka huu.
Hakimu anayesikiliza kesi hiyo, Ruth Massamu alikubaliana na ombi hilo.
Kwa
mujiubu wa mwanasheria wa serikali, Seif Ahmed, washitakiwa walimtukana
Mbunge Mwigullu kuwa ni malaya, mzinzi na mpumbavu huku wakijua wazi
kuwa kitendo hicho ni kinyume na sheria.
Seif alisema kuwa washitakiwa walitenda kosa hilo kwenye mkutano wa hadhara uliofanyika katika kijiji cha Nguvumali.
Katika
hatua nyingine, vijana nane wakazi wa kijiji cha Nguvumali ya Ndago
jimbo la Iramba Magharibi wanaotuhumiwa kumuuwa Mwenyekiti wa Umoja wa
Vijana (CCM) kata ya Ndago, Yohana Mpinga (30), kesi yao imeahirishwa
hadi Agosti 13, mwaka huu.
Washitakiwa
hao ni Manase Daudi (40), Williamu Elia (33), Frank Stanley (20),
Charles Leonard (36), Tito Nintwa na Fillipo Edward (30).
Mwanasheria
wa serikali mwandamizi, Neema Mwanda, alidai mbele ya hakimu Massamu
kuwa mnamo Julai 14 saa kumi alasiri katika kijiji cha Nguvumali,
washitakiwa wote kwa pamoja walimpiga kwa kutumia fimbo na mawe
mwenyekiti huyo kusababisha kifo chake.
Vile
vile jumla ya washitakiwa 12 wanaotuhumiwa kufanya vurugu katika
mkutano huo wa hadhara wa CHADEMA katika kijiji cha Nguvumali na
kusababisha kuvunjika kwa amani na utulivu kesi yao imeahirishwa hadi
Agosti 13 mwaka huu itakapotajwa tena.
Ilidaiwa kuwa upelelezi wa kesi hiyo bado haujakamilika.
