Chama cha soka nchini Uingereza FA kimemfungia mechi 6 beki wa Manchester United Jonny Evans kwa kosa la kutemeana mate na mshambuliaji wa Newcastle United Papiss Cisse.
Tukio hilo lilitokea katika dakika ya 38 ya mchezo katika mechi hiyo iliyopigwa katikati ya juma hili kwenye uwanja wa St.James Park huku Manchester United ikiibuka na ushindi wa 1-0 katika dakika za mwisho.
Awali Evans alikataa kufanya tukio hilo na kushangazwa na vyombo vya habari kwa kuzidi kumzonga lakini kwa upande wa Cisse alikiri kumtemea mate beki huyo na hivyo kupokea adhabu ya kufungiwa michezo 7 kutoka kwa chama cha soka nchini humo.
Adhabu hiyo itafanya beki huyo wa Manchester United kukosa mchezo wa robo fainali dhidi ya Arsenal utakaopigwa keshokutwa jumatatu kwenye uwanja wa Old Trafford na mechi nyingine atakazokosa ni dhidi ya Tottenham machi 15,Liverpool machi 22,Aston Villa April 4, Manchester City April 12 na ile ya April 18 dhidi Chelsea.
Aidha taarifa kutoka FA inasema kuwa wachezaji hao wamepewa adhabu hiyo kwa kuzingatia sheria namba E1(a) na Cisse amefungiwa mechi moja zaidi kutokana na adhabu ya kufungiwa mechi 3 aliyoipata mwanzoni mwa msimu huu.
