Balozi Seif Ali Iddi akagua ujenzi wa bara bara Koani - Jumbi zanzibar

Makamu wa Pili wa Rais wa Zanzibar Balozi Seif Ali Iddi alisema uamuzi uliochukuliwa na Wizara ya Miundombinu na Mawasiliano Zanzibar wa kujadiliana na mjenzi wa Bara bara ya Koani hadi Jumbi ndio njia pekee itakayoweza kufanikisha ujenzi wa Bara bara hiyo. Alisema uamuzi wa pande hizo mbili wa kupelekana Mahakamani hautowasaidia Wananchi ambao lengo lao ni kupata huduma za mawasiliano ya bara bara kwa kuendesha harakati zao za kimaisha.

Balozi Seif alisema hayo wakati akikagua ujenzi wa bara bara Koani hadi Jumbi inayojengwa na Kampuni ya Shapria unaofadhiliwa na Benki ya Maendeleo ya Kiislamu{ BADEA } akiwa katika ziara ya siku moja kukagua shughuli za maendeleo ndani ya Wilaya ya Kati.

Alisema changamoto zilizojitokeza katika ujenzi wa bara bara hiyo likiwemo suala la uchelewaji wa fedha za kuendesha mradi huo kutoka Nchini Sudan linapaswa kujadiliwa kwa makini na pande hizo mbili ili kufikia muwafaka utaoleta hatma njema kwa wananchi.

Makamu wa Pili wa Rais wa Zanzibar alieleza kwamba nia ya Serikali ni kuona miundombinu inayoitekeleza kila siku ikiwemo sekta ya mawasiliano hasa bara bara inawafikia wananchi wote mjini na vijijini.

Katika ziara hiyo Makamu wa Pili wa Rais wa Zanzibar alikagua jengo jipya la Ofisi ya Mkuu wa Wilaya ya Kati liliopo Dunga na kuridhika na hatua iliyochukuliwa na Uongozi wa Wilaya hiyo kwa kuamua kuanzisha mradi huo utakaokidhi haja kwa wakati huu. Mkuu wa Wilaya ya Kati Nd. Vuai Mwinyi alimueleza Makamu wa Pili wa Rais wa Zanzibar kwamba mradi huo Mkubwa ulioanza Tarehe 23 Mei Mwaka 2012 unatarajiwa kukamilika kwake mwezi Januari mwaka 2016.

Nd. Vuai alisisitiza kwamba ujenzi wa Ofisi ya Mkuu wa Wilaya ya Kati umekuwa ukifanywa kwa awamu mbali mbali kulingana na makusanyo ya mapato pamoja na wafadhili tofauti.

Katibu Mkuu Wizara ya Miundo mbinu na Mawasiliano Dr. Juma Malik mwenye miwani akimueleza Makamu wa Pili wa Rais wa Zanzibar Balozi Seif kulia yake harakati za ujenzi wa Bara bara ya Koani hadi Jumbi alipoitembea mapema asubuhi.Kushoto ya Dr. Malik ni Mwakilishi wa Jimbo la Koani Mh. Mohd Raza na kulia ya Balozi Seif Mkuu wa Mkoa wa Kusini Unguija Dr. Idriss Muslim Hija na Mkuu wa Wilaya ya Kati Nd. Vuai Mwinyi.

Mkuu wa Wilya ya Kati aliyepo Kati kati aliyenyanyua mkono juu Nd. Vuai Mwinyi akimpatia maelezo Makamu wa Pili wa Rais wa Zanzibar Balozi Seif kuhusu ujeni wa jengo jipya la Ofisi ya Mkuu wa Wilaya ya Kati liliopo Dunga.