Waziri Mkuu, Mizengo Pinda akifungua wodi ya ya wanawake wajawazito wanaosubiri kujifungua katika hospitali ya wilaya ya Urambo, Oktoba 12, 2014. Kushoto ni Mbunge wa Viti Maalum, Margareth Sitta ,,watatu kulia ni Mbunge wa Urambo Mashariki na Waziri wa Ushirikiano wa Afrika Mashariki, Samuel Sitta na wapili kulia ni Mkuu wa Mkoa wa Tabora, Fatuma Mwansa. (Picha na Ofisi ya Waziri Mkuu) Waziri Mkuu M izengo Pinda na Mbunge wa Urambo Mashariki, ambaye pia ni Waziri wa Ushirikiano wa Afrika ya Mashariki, Samuel Sitta (mwenye miwani ya jua nyuma ya Waziri Mkuu) wakikagua wodi ya wanawake wajawazito wanaosubiri kujifungua katiak
hospitali ya wilaya ya Urambo, Oktoba 12, 2014. (Picha na Ofisi ya Waziri Mkuu)
Waziri Mkuu, Mizengo Pinda akipokea zawadi kutoka kwa Wabunge Samuel Sitta na mkewe Margareth baada ya kuzindua wodi ya wanawake wajawazito wanaosubiri kujifungua katiak hospitali ya wilaya ya Urambo, Oktoba 12, 2014. Kushoto ni Mkuu wa Mkoa wa Tabora, Fatuma Mwasa.(Picha na Ofisi ya Waziri Mkuu)
Waziri Mkuu, Mizengo Pinda akipokea kwa niaba ya Halmashauri ya Wilaya ya Urambo, msaada wa vyandarua 100 na blanketi 300 kutoka kwa Mbunge wa Urambo Mashariki na Waziri wa Ushirikiano wa Afrika ya Mashariki, Samuel Sitta katika mkutano wa hadhara aliohutubia mjini Urambo, Oktoba 12, 2014. (Picha na Ofisi ya Waziri Mkuu) …………………………………………………………………………………….
*Azindua jengo la kisasa la Mama Ngojea wilayani Urambo
WAZIRI MKUU Mizengo Pinda amewataka viongozi wa mkoa wa Tabora wajipange vizuri na kuhakikisha kuwa wanajenga vituo vya afya katika kila kata za wilaya ya Urambo kwa sababu bado iko nyuma.
"Hatua hii itasaidia kupunguza msongamano wa wagonjwa kwenye hospitali ya wilaya ya Urambo kwa sababu yenyewe imekuwa ndiyo kimbilio la kila mgonjwa kwa sasa," amesema.
Ametoa agizo hilo leo mchana (Jumapili, Oktoba 12, 2014) wakati akizungumza na mamia ya wakazi wa mji wa Urambo mara baada ya kuzindua jengo la Mama Ngojea linaloitwa Mayu Lindila lililopo kwenye hospitali ya wilaya hiyo.
"Wilaya yenu ina kata 16, ina vijiji 57 na zahanati 22 lakini ina kituo kimoja tu cha afya. Na hii maana yake ni kwamba kuna vijiji havina zahanati kabisa. Huu ni mtihani mkubwa na ndiyo maana kila mtu akiumwa anakimbilia kwenye hospitali ya wilaya," alisema Waziri Mkuu.
"Kisera kila kata ni lazima iwe na kituo cha afya, kwa hiyo viongozi wa mkoa na wilaya ni lazima mjipange kuona ni kwa namna gani mtaitekeleza sera hii, na pia jengeni zahanati kwenye vijiji ambavyo havina zahanati," alisisitiza.
Akizungumzia kuhusu umuhimu wa huduma ya Mama Ngojea, Waziri Mkuu alisema unasaidia kuokoa maisha ya mama mjamzito anayetoka kata ya mbali ambaye anakabiliwa na tishio lakini siku zake za kujifungua zinakuwa hazijafika.
Alisema kutokuwepo kwa majengo ya Mama Ngojea katika maeneo mengi ni changamoto kubwa na hatari kwa akinamama wengi hasa waishio mbali na huduma za tiba. "Hivi kama kata moja iko mbali na makao makuu ya wilaya, na mama mjamzito mwenye tatizo hawezi kufika hospitali unadhani ataenda wapi? Si ataenda kwa wakunga wa jadi au waganga wa kienyeji tu?"
Aliwasihi akinamama wa wilaya hiyo wajitahidi kutumia huduma za hospitali kwa sababu kwa wakunga wa jadi na waganga wa kienyeji hakuna wataalamu kama waliopo hospitalini.
Alimtaka Mkuu wa Mkoa wa Tabora, Bibi Fatma Mwassa afanye utaratibu ili kila wilaya pawe na Mama Ngojea. "Hata kama hakuna hospitali ya wilaya lakini pana kituo cha afya, ni vema pawe na jengo la Mama Ngojea ili kuokoa maisha ya akinamama.
Akitoa taarifa ya ujenzi wa jengo hilo, Mganga Mkuu wa Wilaya hiyo, Dk. Kheri Kagya alisema jengo hilo lenye uwezo wa kulaza wagonjwa 24 kwa wakati mmoja, lilianza kujengwa Agosti 25, 2012 na lilikamilika Novemba 10, 2013 kwa gharama ya sh. milioni 198/-. Lina jiko, sehemu ya kulia, mabafu, vyoo, eneo la kufulia na kupumzikia.
Lengo la kujenga kituo hiki ni kupunguza vifo vitokanavyo na uzazi kutoka vifo 228 kwa kila vizazi hai 100,000 na kufikia vifo 90 kwa kila vizazi hai 100,000 au chini ya hapo ifikapo mwaka 2015. "Mwaka 2012 tulikuwa na vifo 253 kwa kila vizazi hai 100,000 na mwaka jana tulikuwa na vifo 228 kwa kila vizazi hai 100,000. Nia yetu ni kupunguza kabisa vifo vya akinamama kabla na wakati wa kujifungua," alisema.
Aliwashukuru Mbunge wa jimbo la Urambo ambaye pia ni Waziri wa Afrika Mashariki, Bw. Samuel Sitta na mkewe Mama Margareth Sitta (ambaye pia ni Mbunge wa Viti Maalum wa Mkoa huo) kwa kubuni wazo hilo na kutafuta fedha za kujenga Mama Ngojea kwenye hospitali ya wilaya hiyo
Wakati huohuo, Bwana na Bibi Sitta wamechangia mablanketi 300 na vyandarua 100 kwa ajili ya Mama Ngojea pamoja na hospitali ya wilaya hiyo.
Waziri Mkuu amerejea jijini Dar es Salaam mchana huu.
