KUNDi la muziki wa Injili la Glorious Celebration la jijini Dar es Salaam limethibitisha kushiriki katika uzinduzi wa albamu ya Uko Hapa ya msanii John Lissu.
Uzinduzi wa albamu hiyo unatarajiwa kufanyika Oktoba 5 mwaka huu, kwenye ukumbi wa Diamond Jubilee, Dar es Salaam, ambapo waimbaji mbalimbali watakuwepo.
Taarifa iliyotolewa kwa vyombo vya habari na Mkurugenzi wa Kampuni ya Msama Promotions inayodhamini uzinduzi huo, Alex Msama ilisema maandalizi muhimu kuhusiana na uzinduzi huo yamekamilika.
Msama alisema katika taarifa hiyo kuwa anashukuru wasanii hao kukubali kutumbuiza, ambapo pia atakuwepo msanii mahiri nchini Rose Muhando pamoja na kwaya mbalimbali.
Glorious wanatamba na albamu mbalimbali ikiwemo ya Niguse yenye nyimbo za Unaweza Yesu, Ee Roho, Juu ya Mataifa, Mawazo, Ameni Haleluya, Nafsi Yangu, Nakupenda Yesu, Usilie na Niguse.
Msama alisema mbali na Glorious, kuna waimbaji wengine galacha wa nyimbo za injili wamethibitisha kushiriki.
Albamu ya Lissu ambaye ana sifa ya kupiga muziki wa live ina nyimbo 18 zilizogawanywa katika maeneo mawili, ambazo ni Wakusifiwa, Wastahili Sifa, Mataifa ya Kujua, Inuka, Uko Hapa, Nijaze, Nitaongozwa, Wastahili Bwana, Roho Mtakatifu, Mtakatifu na Umeinuliwa.
Nyingine ni Yu Hai Jehova, Atikisa, Nijaze, Upendo, Mataifa Yakujue, Umejawa na Ukuu, Fungua Macho, Haleluya na Mungu Ibariki.
